政情：葉劉尖子研習班 愛女擔大旗
向來對尖子情有獨鍾嘅立法會議員葉劉淑儀，每年暑假都喜歡用「匯賢智庫」牌頭搞尖子研習班。今年都唔例外，將開班收約一百名中學生，再搵一班劍橋、耶魯、史丹福等名牌大學畢業生做導師，教授語文同歷史。去年仲係導師之一嘅葉太愛女葉榮欣（Cynthia），今年銜頭已升級為「匯賢智庫學苑課程統籌」，連請咩老師都係佢決定。
任課程統籌
匯賢智庫已經唔係第一年搞暑期研習班，葉太話去年反應唔錯，但今年都係維持收生一百人，希望貴精不貴多。為期八堂學費介乎八百至一千元，葉太話自己每年要倒貼八至九萬元，但為咗幫班學生提升語文能力，絕對值得，仲話呢個數買少個名牌手袋已經慳得番喎。
Cynthia做統籌大權在握，葉太咁快將匯賢智庫放手畀愛女搞，似乎對佢能力予以肯定，唔通葉太想愛女繼承衣鉢從政？不過，現時做政界後代壓力好大，會否一步一步嚟好啲呢？