政情：今日你上鏡：熱天着長褸 乾「貞」！

珠海學院屯門青山灣畔新校舍尋日舉行地基竣工儀式，通常呢類活動都係喺空曠嘅地方舉行，事前應該估到有機會暴曬，加上尋日中午氣溫仲高達攝氏三十一度，烈日當空下，現場個個嘉賓都熱到汗流浹背，但出席主禮嘅教育局常任秘書長謝凌潔貞，竟然仲要着住件厚厚嘅長褸，莫非佢着錯衫？見佢身穿一條黑色連身裙，本來都已經特別吸熱，加埋件厚厚嘅長褸，真係睇見都熱上加熱，難怪佢要不斷飲水解喝兼用紙巾抹汗喇。