中環出更:示威者咁撞法 立會出「奇」易爛

立法會審議新界東北發展前期撥款引發反對計劃嘅示威者衝擊立法會大樓,大樓一攻即破,多處地方出現破損兼被指「豆腐渣工程」。負責設計政府總部「門常開」嘅國際知名建築師嚴迅奇(Rocco),尋日出席活動時回應話,設計「門常開」時冇諗過會被示威者強行衝擊,仲話如果咁樣衝法咩都會爛喎!

「有心撞點都爛」

講起立法會嘅建築物料,除咗多玻璃牆,仲有鋁板。Rocco強調,政府總部同立法會所用嘅物料都冇偷工減料,佢哋都係跟住政府要求去做。但點解會咁易撞爛呢?佢就話設計大樓時只會預計可以承受一般撞擊,但如果有人故意強行衝撞,佢哋就無法保障,始終有心撞一定點都會有方法撞爛咁話。

咁咩叫做一般撞擊呢?Rocco話,一個人撞埋去啲鋁板度,咁就應該唔會爛,但如果用鐵撞擊,鐵鬥鐵就好難避免會破損啦!至於早前立法會門外地面鑽窿用作鎖鐵馬之用,佢就話呢方面冇人同佢講,佢亦都冇去睇過,所以評論唔到嘞。

卓妮

第一手消息請下載on.cc東網iPhone/iPad/Android/Windows Phone Apps