政情：反對衝擊立會 偲嫣玩命絕食
泛民早排喺滙豐總行樓下搞過絕食爭普選，部分人聲稱絕食咗超過三百小時，期間仲可以氣定神閒咁返立法會開會發言，打破晒人類極限，不單止引發唔到任何回響，仲畀人質疑佢哋偷食造假。不過，對泛民言行嫉惡如仇嘅正義聯盟召集人李偲嫣，尋日就抄橋宣布喺政府總部對出進行無限期絕食，以示不滿一連三個禮拜嘅衝擊立法會行動同政府嘅軟弱回應。
揚言已交低身後事
李偲嫣喺記召上又自問自答咁話，估到實會有人話佢絕食當減肥，自言減肥有舒舒服服嘅方法，唔使搞到要絕食。佢又強調會自行拍低整個絕食過程，以免有人質疑佢偷食造假。佢最後仲話已經有絕食到死嘅決心，揚言已交低所有身後事。若然最後死唔去，佢哋就會同反對派正式展開「激戰」，包括人釘人狙擊對方同埋發起民間起義喎。
李偲嫣又大鬧黎智英旗下嘅壹傳媒以言論自由為名，將暴力引入香港，不過唔知佢係咪太激動，前先三次將黎智英個名講錯咗「梁振英」。