政情：勞福局漫畫講標準工時

仍然字多過圖

勞工及福利局局長張建宗尋日喺網誌透露，政府推出咗一套漫畫講解標準工時，據講呢套漫畫係標準工時委員會諗出嚟嘅建議，漫畫中有一個叫阿勤嘅員工同老闆對話，然後漫畫主角「工時小博士」就從旁解釋世界各國標準工時嘅例子。

舉例指，韓國規定公司規模少過四個人就可以豁免標準工時，美國公司如果生意額太低，又可以獲得豁免，部分特別行業，例如海員、漁民等也多數納入豁免範圍。講完外國例子就到香港，「工時小博士」話香港係咪要實施標準工時，都係要睇唔同考慮因素，包括商界承受能力，同埋會否令工作「零碎化」等。

今次呢套漫畫雖然圖文並茂，但仍然係字多過圖，或會影響市民一次過睇晒嘅興趣，唔知第時隨着標準工時討論愈來愈深入，當局會否學其他政策局推出「常人包」，再引導社會理性討論政策嘅關鍵內容呢？