比利時兩戰全勝出線
今日凌晨H組次輪兩強大戰，上仗僥倖反勝阿爾及利亞的「歐洲紅魔」比利時，雖然有「金童」夏薩特、「新魔獸」盧卡古表現低迷，但後備入替的奧歷治建奇功，最終以1比0擊敗同組勁敵俄羅斯。比利時目前兩戰全勝得六分，率先取得晉級資格，氹得入場打氣嘅國王菲利普當堂開心晒。
今仗比利時有國王菲利普親臨捧場，賽前有傳中堅高柏尼會因傷倦勤，但這名隊長趕及復出應戰，上仗後備入替建奇功的「爆炸頭」費蘭尼則復任正選。對手俄羅斯主帥卡比路依然對上仗「牛油手」導致失球的門將艾堅菲夫予以信任，雖然比利時初段控制戰局，但具威脅的埋門不多，反而在12分鐘俄軍先有中場法祖林於禁區頂快射，被對方門將泰拔高圖爾斯飛盡救出。31分鐘比軍左閘華美倫因傷退下火線，由維頓漢入替，幸好比利時演出漸入佳境，36分鐘梅頓斯窄位一抽，艾堅菲夫今次冇出醜勇救險球，半場力保不失。
俄羅斯攻極唔入
下半場俄羅斯重新奪回主動權，不斷向比利時施加壓力，領隊韋莫斯見勢色不對，於58分鐘重施上仗對阿爾及利亞的變招，以奧歷治入替表現平平的箭頭盧卡古，雖然「金童」夏薩特全場表現只屬一般，未能全面帶動「歐洲紅魔」的進攻，在81分鐘更被俄羅斯的艾舒真高無人看管起腳僅射斜，幸好比利時末段發力，先有夏薩特妙射罰球中柱，直至87分鐘比利時終由奧歷治接應夏薩特妙傳近門撞入險勝，兩戰得六分，肯定取得出線資格。
