梁啟超講過，少年智則國智，少年強則國強。道理好簡單，青少年係社會未來棟樑，佢哋智唔智、強唔強，當然同社會嘅前途有關喇。弊就弊在，今日香港青少年問題多多，有人失落，有人迷茫，有人走上歧途，有人甚至輕生，香港嘅未來睇怕都不可樂觀咯。
呢，撒瑪利亞防止自殺會統計數字顯示，舊年本港經死因裁判庭確認嘅自殺死亡個案達一千零四十宗，自殺率達十四點四一，即係每十萬香港人就超過十四人自殺，比前年八百四十五宗自殺個案多咗近二百宗。最值得留意嘅係，自殺有年輕化趨勢，其中二十九宗係十九歲或以下人士。而該會舊年處理嘅一千三百幾宗自殺危機個案中，十九歲或以下人士就有八十三宗，佔整體百分之六點三三，比前年五十四宗大幅增加二十九宗，問題都咪話唔嚴重。更得人驚嘅係，呢啲求助個案中，年紀最細嘅竟然只有六、七歲，有位女童沉迷網上遊戲，以為好似遊戲角色咁死咗可以翻生，簡直匪夷所思。
正所謂，螻蟻尚且偷生，點解愈來愈多青少年有輕生念頭呢？撒瑪利亞會係咁講嘅，學業壓力及精神健康問題係時下青少年面對嘅最大困擾。例如有位十九歲少女咁吖，舊年成功考入本港著名大學，但由於未能適應大學課程，加上要重新建立社交圈子，又缺乏足夠嘅支援網絡，負面情緒日積月累，導致產生自殺念頭，好彩後來經過治療及鼓勵，終於重新企起身。不過咁，唔係個個都咁好彩，唔少輕生者因為得唔到適當輔導及鼓勵，成為社會犧牲品，真係冤哉枉也。
十年樹木，百年樹人，青少年受到學業及精神健康困擾，正正反映香港教育出咗問題。校園生活本來應該係健康嘅、快樂嘅，依家搞到學生又緊張、壓力又大，呢啲咪就係教育政策失敗嘅惡果囉。當然喇，除咗教育失敗，社會環境轉變亦係導致青少年迷茫嘅主要原因，今日香港好似一潭死水咁，向上流動難過登天，青少年睇唔到前途，失去人生目標，意志消沉之下，自然容易出事。
講開又講吖，自殺年輕化固然令人擔心，而暴力年輕化亦係好大問題。近年社會泛政治化，示威遊行愈來愈激進，愈來愈暴力，當中就有唔少青少年嘅身影。本應留喺校園專心讀書嘅學生，家陣紛紛走上街頭，簡直係社會嘅悲哀，再咁落去，香港都唔知會變成乜嘢世界！
無論點都好，老年人常思既往，少年人常思將來。世界始終係青少年嘅，最緊要珍惜生命，珍惜前途，千祈唔好自暴自棄，更加唔好行差踏錯吖！