政情：徐英偉「唸書」 施麗珊暗寸
由一班青年人創立嘅香港青少年領袖發展協會，尋日喺港大搞咗新一屆領袖計劃開幕禮，並邀請到民政事務局政治助理徐英偉（Caspar）及香港社區組織協會（SoCo）幹事施麗珊做嘉賓，佢哋仲喺研討會上大講新移民問題。不過，Caspar發言之後，施麗珊就話替Caspar感到辛苦，仲話佢呢份工好難打喎，莫非Caspar呢份工真係唔易做？
講足十分鐘 「份工真辛苦」
話說Caspar率先發言，一向好熟書嘅佢就好似「唸書」咁非常詳細講出政府協助新移民嘅政策，當中包括新移民人數、主要居住邊區，以及民政事務總署有關新移民來港後感受嘅問卷調查等等。之後輪到施麗珊發言嘅時候，佢就笑言Caspar呢份工真係辛苦，因為政府都冇專門協助新移民嘅服務，但Caspar竟可以講足十分鐘咁耐，講到好似政府做咗好多嘢咁喎。雖然施笑笑口咁講，但擺明係借Caspar嚟寸政府啦！
