政情：「太太永遠大晒」 翟少喺屋企冇發言權
剛卸任監警會主席嘅資深大律師翟紹唐（翟少）早前接受電台訪問時，曾用違例泊車比喻佔領中環行動。佢話雖然佔中係違法，但參與者願意接受法律制裁，所以唔影響法治喎。翟少日前出席活動時就透露，佢舉呢個例子事前並冇預先諗好，只係即場爆肚。平時佢上庭雄辯滔滔，喺屋企係咪一樣經常拗贏太太呢？翟少就自爆話，在家太太永遠係大晒嘅，佢冇發言權之餘，亦根本唔需要同太太爭論喎。
至於卸任後會否考慮參與其他公職呢？翟少就話，嚟緊除咗會專注處理最低工資委員會嘅工作外，仲會騰出更多時間陪家人。不過，佢曾經接過同食肆有關嘅官司，同太太行街時咪有啲食肆唔去得？
佢就話的確係咁，但佢一定心裏有數，好似中環某食肆咁，佢至今都唔可以踏足，而灣仔有間「富豪飯堂」一分為二後，佢就可以去新嗰間嘞。