香港電台早前想向政府申請六十億元，喺將軍澳興建新大樓，但唔少立法會議員批評太貴，最終要撤回撥款申請。港台起間新大樓都話要六十億元，重建瑪麗醫院都係差唔多價錢，港台真係大花筒。港台之所以要起新大樓，其中一項工作就係發展數碼電視頻道，今年初開始三條數碼電視頻道廣播，依家新大樓興建無期，而港台又唔夠地方用，只好花公帑四出租用寫字樓。
有港台中人話，依家數碼電視控制室只能容身於電視大樓幾百呎「豆腐潤」咁大嘅地方，而佢哋做媒體資產管理同事，負責將港台舊資料數碼化，就要分布喺上環同西貢返工，加埋九龍塘港台現址，真係港九新界都有港台辦公室。
港台話，佢哋一一年開始租用上環林士街海港政府大樓，約四百呎擺放錄影帶以及少量機器，之後一年就打西貢政府合署主意，租用接近一千呎地方，等技術人員同承建商做媒體資產管理。兩個地方分別有廿名員工返工，如果港台職員要搵舊片，隨時要搭車去攞。
除咗媒體資產管理，港台電視部同行政部有百多名同事，早於一○年就喺九龍塘創新中心兩層合共千五呎地方辦公，但咁都未夠，皆因政府洽商緊喺旺角商業大廈租用辦公室，港台希望今年底再搬啲部門過去。睇嚟港台為咗搞數碼電視廣播頻道，真係使咗唔少公帑，但到底係咪物有所值呢？