政情：搵到副局長 小肥張齊章
社會民怨重，令唔少有志之士都唔肯加入政府呢個「熱廚房」為市民服務。不過有人辭官歸故里，亦有人漏夜趕科場，據聞政府現有嘅最後一個副局長空缺、勞工及福利局副局長席位，終於搵到合適人選出任。至於最快喺今年暑假成立嘅創新及科技局，三個政治委任職位包括局長、副局長同政治助理，據聞亦有好多人爭住做，可能連同勞福局副局人選一次過公布，令副局問責團隊歷史性首次齊班。
人選難揀 易有利益衝突
政界之前已多次傳過搵到勞福局副局長人選，但都只聞樓梯響，令人質疑勞福局局長張建宗（小肥張）點解咁揀擇。有知情人士解釋，勞福局副局長人選認真唔易揀，如果揀熟悉勞工界嘅人，好容易會被資方質疑偏幫打工仔，對於該局處理最低工資檢討、標準工時立法、擴大輸入外勞、以及取消強積金對沖機制等勞資雙方有強烈分歧嘅議題，可能會不利。
若然揀有社福界背景嘅人，當局亦要相當小心，因為社福界一向山頭林立，互相競逐政府資源同資助，如果副局長人選同某派社福團體關係過分密切，好難完全劃清界線，咁就唔揀好過揀嘞，據聞之前有啲應徵者就係因此而落選。至於今次小肥張揀啱嘅人係邊個？來自勞工、社福、抑或其他界別？知情人士就唔肯透露，擔心會「見光死」。
政治議題少 創科局搶手
創科局方面，熱門局長人選依舊係傳咗足足兩年嘅理工大學副校長楊偉雄，而副局長傳聞人選就多囉，幾乎所有稍有知名度嘅建制派IT人都傳過。
據聞有人更向政府表明，如果冇得做副局長，低級啲嘅政治助理都照殺，求官心切。官場中人指出，創科局政策範圍較窄，政治性議題較少，包括唔使處理最敏感嘅廣播同版權政策，自然多人爭住做。因此只要創科局能夠避過立法會「拉布」戰並順利成立，人選絕對唔成問題。