政情：中環出更：陳楚鑫食退休飯 多過務正業
星期二先執包袱提早退休嘅消防處處長陳楚鑫，連日大搞退休騷兼借退休之名四出飲飲食食，即使被連番踢爆都未見收歛。陳楚鑫繼前日喺沙田萬怡酒店筵開五、六席同消防高官食晏後，卓妮尋晚又撞到佢現身沙田賽馬會宴會廳，原來再有近二百名高官為佢設官式告別晚宴，究竟退休在即嘅陳楚鑫仲有幾多餐告別晚宴要食呢？似乎佢食飯多過做正經嘢喎，難怪任內劣迹斑斑啦！
現身馬會宴廳 行徑鬼祟
尋晚近七點半鐘，陳楚鑫一身白色禮服，乘坐政府座駕現身馬會大樓，除咗冇見佢再次偕妻飲飲食食，亦冇再好似前日出席沙田消防局嘅「退休騷」咁，要「泊車仔」幫佢泊車。不過，唔知係咪因為被我哋連番踢爆佢貪威識食，陳楚鑫見到卓妮都只係掂行掂過上宴會廳，未有交流半句，認真鬼祟。
據了解，晚宴由各人自費，消防中人更對外宣稱連陳楚鑫本人都要自掏荷包埋單，閂埋房門有冇「刷鞋仔」爭畀錢就不得而知嘞。但對比警隊「一哥」退休，都只係舉行簡單告別檢閱儀式，陳楚鑫就算自費食飯，都唔知浪費咗幾多本應開工嘅公帑，畀佢出去飲飲食食。而卓妮等咗兩個幾鐘，都未見陳楚鑫離開嘅蹤影，睇怕佢又經秘道離開。
卓妮