政情：中環出更：「新小巴大王」帶愛女取商經
香港營商競爭激烈，新世代想創業一啲都唔容易。早前香港青年聯會會董王淑筠（Diana）在中環開設一間咖啡店，好多名人去捧場，「新小巴大王」馬僑生亦帶埋囡囡Kristin去觀摩。馬僑生話，小巴生意難做，所以早前佢成功投得領匯出售嘅商場，首次涉足商場管理，目前正由囡囡負責租務工作。當日佢特登帶囡囡出來睇吓，以便引入特色商戶，為商場注入新元素。
馬僑生話，小巴座位數目有限，新入行嘅年輕人又少，所以好難增加班次提升載客量，面對行業經營困難，惟有另謀出路，靈活應變。Kristin啱啱接手家族業務約九個月，適逢公司轉型，正好當創業咁做。
吳宏斌帶病撐老友場
當日去捧場嘅仲有廠商會副會長吳宏斌（Dennis），Dennis同Diana媽咪雷雅婷相識幾十年，兩人都係做珠寶生意，所以好啱傾。當日Dennis感冒睇完醫生，拎住包藥都要趕去捧場，可惜唔食得雪糕，淨係飲杯咖啡過口癮。
而Diana做金融業嘅丈夫高福辰亦有到場，卓妮見佢滴晒汗，原來佢公司喺附近，趕過嚟為太太打氣。佢好鍾意飲咖啡，今次太太開店都有畀意見，話以後可以帶埋同事去食雪糕喎。
卓妮仲見到立會前議員李華明（肥仔明），肥仔明鍾意食朱古力但又要健康，所以專揀糖分同奶類特別少嘅種類，當日仲不停問店員有冇可可濃度高過百分之八十嘅朱古力喎！
卓妮