少年廚神自毀 街坊感慨
少年廚神劉嘉麟（阿B）在元朗錦綉花園住所燒炭自殺身亡，看着他長大的街坊昨同聲嘆息，慨嘆其父早年因欠賭債「走佬」，不料阿B重蹈父親覆轍，染上賭博惡習，「估唔到老竇係咁，個仔又搞成咁，好可惜」。「食神」梁文韜與阿B家人相熟，一直視他為後輩予以提攜，對他走上絕路深感惋惜。至於阿B家人在流浮山的歡樂海鮮酒家，昨如常營業。
終年三十歲的劉嘉麟，家人昨晨在錦綉花園住所門外點起兩支白蠟燭，燭台寫有「迎歸佛國」及「接引西方」悼念語。街坊驚悉劉自殺身亡，無不感到傷感。老一輩街坊稱看着阿B成長，「佢咁後生，又靚仔又叻仔，仲咁有錢，平時對啲親朋戚友同街坊都好好，好難相信佢會搞成咁，個心好唔舒服。」有街坊估計，是因為出名令阿B走上不歸路，「收入多咗，賭大咗，可能出名害咗佢啦」。
韜韜：佢年少氣盛差錯腳
食神梁文韜（韜韜）昨在電話中回應事件時指，早年已與阿B父親相識，當時劉父在流浮山憑其一手好廚藝紅極一時，經常到其酒家吃飯，又視阿B是後輩，但不清楚他有賭波習慣。韜韜續指，阿B或被名氣沖昏頭腦，「啲人對佢太過抬舉，佢年少氣盛，惹咗啲不良習慣差錯腳，都幾可惜」。
消息稱，劉嘉麟在飲食界攀上頂峯後踏足商界，近年北上創業，在內地開設財務公司，但疑投資失利，去年孭上至少一千萬元債項；加上賭性難改，近期他投注世界盃賽事，但因多場賽事爆冷而狂輸錢，更有傳他買重西班牙輸到入肉。上周四（十九日）晚上八時許，阿B的姓張男友人因無法與他取得聯絡，登門探訪，揭發他在睡房內燒炭喪生。