政情：八網難逃：示威者撞門黃浩銘勸阻
警方就上周五衝擊立法會事件，拘捕咗廿一名示威者，當中最少包括兩名議員助理，相信唔少人都會第一時間諗起社民連立法會議員梁國雄嘅助理黃浩銘，認為佢有向貪曾前特首曾蔭權爵士「掟飯」同喺立法會「玩升降機」嘅前科，唔使問都肯定有份衝擊立法會。但近日一段喺社交網絡瘋傳嘅短片，就令人對佢改觀。
立會受衝擊 籲考慮後果
片中見到，上周五晚上有幾位示威者舉起兩個鐵馬，講明想用嚟撞門，黃浩銘隨即向對方大叫：「唔可以呢度！」並伸手阻住佢哋，質疑新界東北村民係咪同意用呢種方法抗爭，叫呢班所謂「行動者」諗清楚後果。黃浩銘同對方爭論咗一輪之後，先至肯放番低對手。
黃浩銘最後仍因為拒絕離開警方訂立嘅封鎖線，被警方以涉嫌非法集結罪名拘捕，但佢當晚並無用武力衝擊立法會大樓。佢事後就話對呢段短片冇特別感覺，只係希望其他人行動前，諗清楚可以付出幾多代價，以及對大局嘅影響喎。