往事只能回味，香港素有「購物天堂」美譽，吸引四方來客，可惜花無百日紅，隨着香港不斷沉淪，購物天堂睇怕已成為明日黃花咯。早前公布嘅四月份零售數據按年大跌近一成，就係一個明顯警號，零售業無以為繼，經濟增長缺乏動力，你話香港點會有運行吖。
嗱，唔係功夫茶亂噏。四月份零售數據唔止係連續第三個月下跌，仲係○九年以來最大跌幅，當中跌得最勁嘅係珠寶、鐘錶及名貴禮物等奢侈品，銷貨價值暴瀉近四成。連財爺曾俊華都話對第二季經濟數據感到憂慮，考慮下調全年經濟增長預測咁話。鬍鬚曾年年估錯財政數字，但今次就可能估中喇。
係人都知，內地旅客撐起本港零售業半邊天，依家內地旅客消費模式改變，原因固然可能同近年內地經濟增長放緩、當局強力反腐有關，但講到尾，問題始終喺香港自己身上，激進團體三不五時上演「驅蝗」、「拖篋」鬧劇，唔趕客至奇喇。呢，內地一項網上調查顯示，約七成受訪者聲稱未來一年唔會訪港，主因係「唔想被歧視」、「香港唔夠人情味」。所以話啫，此地不留人，自有留人處，內地旅客大把選擇，唔一定要嚟香港受氣啫，係咪？
講開又講，零售業持續十年錄得高增長之後無以為繼，除咗反映「驅蝗」團體「求仁得仁」，亦反映本港產業結構過於單調。正所謂一榮俱榮，一損俱損，零售業過分倚賴旅遊業，而旅遊業又過分倚靠內地客，將雞蛋放喺同一個籃，又點會有好結果吖。正如「東方報業民意調查」顯示，四成三受訪者認為內地經濟及政策有變，香港首當其衝；兩成八批評產業結構欠多元化；兩成五更加認為跌幅會成為趨勢添。
當然喇，香港係彈丸之地，每年要接待幾千萬名內地旅客，難免出現混亂，加上兩地文化背景及生活習慣唔同，摩擦愈來愈多，矛盾愈演愈烈，問題不容忽視，個人遊政策的確有必要檢討。不過咁，一味限制內地旅客訪港，係咪一個好嘅解決方法呢？香港經濟又係咪承受得起衝擊呢？
咁講啦，喺各國爭相搶奪內地客嘅今日，香港反其道而行，一啲都唔正常。上述民調顯示，三成七受訪者表示須檢討一簽多行安排；三成三贊成發展更多配套，建邊境購物城疏導旅客；兩成七認為檢討個人遊政策後果難料，須先作評估。講到底，與其斬腳趾避沙蟲，不如諗吓點樣提升旅遊設施，點樣疏導旅客。嗱，港府聲稱要將產業「做多做闊」，唔好一味得個講字吖！