立法會幾經辛苦通過財政預算案，財政司司長曾俊華（鬍鬚曾）終於唔使個個星期透過網誌鬧爆「拉布」行為。不過，唔知係咪上星期太多新聞，鬍鬚曾尋日嘅網誌就化身成大雜燴盆菜，先係講香港今年經濟不容樂觀，然後又講個人遊政策，認為香港經濟並無過度倚賴個人遊喎，但上星期佢先至話擔心零售額下跌影響經濟及就業，真係一時一樣。最後佢連白皮書都講埋，總之成篇文章鬆散、毫無重點，真係唔知佢起個「一起實現普選」標題做乜，似乎係文不對題囉！
