政情：慳水去到盡 黑英少洗頭
夏日炎炎，唔少人都會開大冷氣或沖涼消暑，用電用水一樣咁犀利。同環境局局長黃錦星（星星）鬥環保嘅天文台前台長林超英（黑英），尋日出席地球之友節能比賽活動時，又講番鬥慳電輸星星嘅舊事。原來講到用水，黑英都要投降，因乜解究呢？黑英話，因為佢嘅兼職傭工用好多水，入埋佢數好唔忿氣。
分半鐘沖完涼
至於黑英就計過自己沖涼半分鐘就足夠淋濕全身，如果用番梘後沖水，頂多用一分鐘，夾埋都係一分半鐘。佢又透露，自己沖涼連番梘都唔用，因為古時啲人都冇番梘用，又承認冇乜洗頭，估唔到為慳水，佢都去得幾盡喎！
另外，環境局就未來發電燃料組合展開公眾諮詢，到今個星期三就完結。活動主持就以娛樂圈女藝人「A餐」同「B餐」來比喻南方電網及增加天然氣選項，但當問到黑英鍾意「A餐」定「B餐」時，可能佢驚被老婆扭耳仔，最後話兩個餐都唔揀！因為佢覺得港人可以有效減少用電，到時兩電唔使投資，就係「０餐」咁話。