政情：易攻難守 立會怎維安
上周五立法會財務委員會審議新界東北新發展區前期工程撥款申請，幾百名示威者衝擊立法會大樓，雖然秘書處早已制訂臨時措施，與警方聯手防範示威者闖入大樓「佔領立法會」，但最終大樓多處設施仍遭毀壞，事件就暴露立法會大樓存在嚴重保安漏洞。今次之所以搞到咁嚴重，完全因為立法會保安措施「十個煲九個蓋」，秘書長陳維安（Kenneth）顧得呢邊顧唔到第二邊，最後搞到倒瀉籮蟹。
陳擬註銷長毛議員證權限
立法會大樓設計以大量玻璃幕牆為主，寓意立法會係民選機關，一舉一動要具有透明度，但就成為示威者攻入大樓嘅最佳途徑。雖然Kenneth事前已經吩咐保安喺玻璃幕牆外放置大量鐵馬，阻止示威者闖入，但可惜百密一疏，冇喺餐廳隔籬嘅玻璃門前擺放鐵馬，令餐廳成為示威者其中一個攻擊目標。
此外，由於大樓外牆好多係空心石屎，再加上立法會嘅鐵馬較輕身，令示威者可以輕易抬起鐵馬撞爛其中一道防火門嘅石屎飾板。
至於對上一次會議有議員助理利用職權放班示威者入大樓示威，Kenneth除咗表明會考慮追究該等人士外，仲考慮要求秘書處索性註銷正在服刑嘅議員梁國雄（長毛）嘅議員證權限，等佢出獄後才重新啟動出入權限，避免有人利用長毛張議員證搞搞震。民間團體同新界東北村民尋日原本借用長毛嘅名義喺立法會房間開會，但一班建制派即時向Kenneth投訴，話長毛明明坐緊監，有乜可能可以陪佢哋開會。
有人倡禁袁彌明駕入車場
最後民間團體就搵咗議員張超雄幫手，張超雄向秘書處承諾會坐定定睇住佢哋開會，並確保所有人喺記者會後離開立法會，秘書處先至肯批出申請。雖然秘書處咁做係嚴厲咗啲，但喺呢個裏外受敵嘅情況下，實施嚴密嘅保安措施實在無可厚非。
對於人民力量主席袁彌明前晚用車輛阻塞立法會嘅停車場出入口，事後有建制派議員條氣好唔順，並促請秘書處以後禁止有不良紀錄嘅議員助理將車輛駛入停車場。