中環出更：慶祝父親節名人晒幸福

尋日有唔少人都趁機會大晒幸福同爸爸歡度父親節，享受天倫樂。旅遊作家項明生（James）同立法會議員莫乃光（Charles）就選擇在社交網站，展示童年時與爸爸嘅溫馨合照。相中細個嘅Charles眼仔睩睩，有朋友就留言話，佢同依家樣貌成個餅印咁。而James就上載咗一張爸爸用單車載住佢同哥哥嘅陳年舊照，並感謝爸爸造就今日嘅佢。

晒童年照<br>項明生（中）細個同哥哥坐住爸爸（右）架單車周圍去。（互聯網圖片）

晒童年照
項明生（中）細個同哥哥坐住爸爸（右）架單車周圍去。（互聯網圖片）

項明生感謝父培養

James喺網站透露，爸爸當年從冇送過玩具畀佢，但就用微薄嘅薪水，買咗大量好書畀佢。佢就係靠閱讀《牧羊少年奇幻之旅》及《魯賓遜漂流記》等名著，喺飯都食唔飽嘅七十年代，有狄更斯、雨果、大小仲馬、三毛等每日輪流「陪伴」佢，帶佢出遊世界各地，令佢成為今日嘅旅遊達人兼作家。佢又回想起人生第一次遠征，就係同哥哥坐喺爸爸嘅單車後座上，感受夜風擦過、野花撲鼻香氣及觀賞田野往後奔馳嘅景色，至今仍歷歷在目。

除此之外，單車與爸爸總係令人聯想起溫馨甜蜜嘅畫面，仲係唔少爸爸同子女嘅溝通橋樑，連商務及經濟發展局副局長梁敬國（Godfrey）平日都鍾意同愛女一齊喺科學園一帶踩單車。