消防處處長陳楚鑫任內劣迹斑斑，而且屢爆醜聞，令消防團隊蒙羞，好多人一聽到佢於本月下旬退休都感到好高興，但點知佢臨執包袱前都搞出大頭佛。我哋尋日獨家報道，指消防處為咗擦鞋歡送陳楚鑫，竟然將五架新簇消防車做布景板，反而派啲老爺消防車出勤，真係搵市民生命嚟較飛。如果唔係上樑不正，下屬又點會搞埋呢啲「歡送大龍鳳」吖，但願陳楚鑫屋企或附近地方安然無恙，否則因為出動啲老爺消防車而耽誤咗救火或救援工作，咁佢就真係自作孽喇！
