政情：為選醫學會 史泰祖退黨

其實史泰祖退黨可以話有迹可尋，佢去年開始已經淡出黨務，唔再擔任新民黨副主席，只保持黨員身份。直至最近，由於史泰祖要角逐醫學會會長，好多醫學界中人就苦口婆心同佢講，如果佢背負政黨之名，會員未必咁鍾意，勸佢盡快退黨。史泰祖本來都唔想，諗住淡出黨務、減低政治色彩就冇問題，點知佢做過問卷調查，證實班醫學會會員唔鍾意會長有政黨身份。

所以大概兩個月前，史泰祖已萌生退意，並向黨遞交退黨信，當時葉太曾作出挽留，但佢依然選擇離開，仲話自己由創黨至今，既參加過選舉，又做過副主席，咁多年來算有貢獻，對得住個黨，係時候換吓身份繼續服務社會。史泰祖退黨後，就會拍住眼科醫生周伯展同兒科醫生陳以誠，合組內閣參選醫學會，佢做會長，周、陳二人就會擔任副會長。選舉報名期就快結束，據聞佢哋三人仲未有對手，睇嚟史泰祖自動當選嘅機會非常之高。

「做議員作用有限」

醫學會會長兩年一屆，兩年後就輪到立法會選舉，眾所周知，現任醫學界議員梁家騮無心戀戰，平時去湊女同做手術仲多過開會，下屆擺到明唔想再玩。而過往亦有唔少醫學會會長有意出戰立法會醫學界功能界別，唔通史泰祖都想行呢條路，做完兩年會長後再戰立法會？

史泰祖好老實話，做立法會議員只係七十分之一，作用有限，反而用醫學會會長身份，相信幫到業界更多。咁都啱嘅，立法會醫學界選舉經常爆冷，係回歸後換人換得最頻繁嘅功能界別之一，就算史泰祖肯出戰，都唔敢寫包單贏硬嘅。