政情：中環出更：立會爆抗爭藍爺不解
立法會前日再被衝擊，唔單止緊急出入口被示威者打爛，玻璃門亦被敲裂，可以講係完全失控。講起失控，真係不得不提民政事務局前局長藍鴻震（藍爺）喇！當年佢退休前向立法會提交《建築物管理修訂條例》被否決，表現有啲失控，佢就爆出經典名句「Everything under control（一切在控制範圍內）」。如今立法會失控，藍爺就話，根本唔清楚班示威者為咩而抗爭。
指大多示威者非東北村民
藍爺尋日出席中央圖書館一項展覽活動時話，立法會班示威者大部分唔係為自己抗爭，因為都唔係新界東北村民，又懷疑香港係咪有咁多見義勇為嘅青年人喎！藍爺仲話，以前新界村民激動同反對發展係有道理嘅，撇開佢哋嘅抗爭係咪正確，但以前啲村民擁有土地，世世代代住咗喺嗰度百幾年，而唔係好似衝擊立法會班人咁，連有冇踏足過新界東北土地都唔知。
示威者去立法會抗爭都搞到一鑊泡，如果真係發生佔領中環行動（佔中）又點呢？中華總商會會長楊釗就話，其實聽聞有啲位於中環嘅公司都開始擔心，但佢公司喺九龍灣，相信唔會受任何影響。佢已同朋友講明，一旦佔中發生，可以借出地方畀朋友做後備公司喎。
卓妮同場仲見到香港青年交流促進聯會創會主席龍子明，以及其兒子，學生發展委員會創會主席龍允生。
龍子明唔認同激進手法
龍子明話，見到前日立法會有示威者抗爭嘅電視畫面，對香港未來好擔心，認為整體社會氣氛愈來愈差，示威者抗爭手法愈來愈激，警方就更加依法辦事，咁樣並非好事喎。
龍子明又話，佢培養兒子自小就要多認識國家，好似兒子就讀小學六年級時，半推半氹下就參加火車團去井崗山考察，初時兒子喊住咁話唔去，但旅程完結後就話下次都要參加喎，所以真係生命影響生命。
卓妮