哥倫比亞3蛋贈希臘

哥倫比亞上次出戰世盃已經係1998年，今屆賽事雖然王牌射手法卡奧於最後階段因傷落選23人大軍名單，但他今仗都穿上恤衫西褲入場為球隊打氣，主帥柏加文沿用名不見經傳的杜費路古迪利斯打箭頭，將在歐洲打出名堂的前鋒卡路士巴卡及積臣馬天尼斯放在後備席，哥軍一開波即壓住希臘來攻，僅5分鐘保羅艾美路接應古達度右路傳中勁射，意外地省中希臘後衞文奴拿斯改變方向溜入網，極速打開紀錄。

希臘頂住哥軍一輪急攻後開始反撲，28分鐘老將加拉高尼斯罰球斬入禁區，守將托路斯迪斯勁頂僅僅斜出，之後森馬拉斯窄位抽射亦遭沒收，完半場前彭拿基奧迪斯干尼於禁區頂妙射，又過唔到哥倫比亞門將奧斯賓拿十指關，令希臘半場落後一粒。

有靚女球迷打氣，難怪哥倫比亞球員踢得特別落力！

法卡奧雖然冇份落場，但仍然現身支持隊友。（法新社圖片）

希臘中楣運都輸埋

易邊後哥倫比亞乘住希臘心急扳平谷前進攻，不斷搵機會打反擊，中場核心占士洛迪古斯炮彈式遠射又勁又有角度，但希臘門將卡里捷斯飛身救出，去到58分鐘哥軍右路角球傳中，杜費路古迪利斯門前撞入成2比0。5分鐘後希臘有個黃金機會，可惜老將基卡斯近門衝頂中楣彈出，連運氣都冇埋，最後占士洛迪古斯入多球，希臘淨吞三蛋。