立法會議員又外遊喇！吖，應該係外訪至啱。立法會交通事務委員會尋日正式發通告，指委員會計劃於本年九月二十三至二十六日去新加坡外訪，話考察「電子道路收費系統（ERP）」及「智能路線信息系統（IRIS）」嘅運作喎。
不過，其實香港早於八十年代就探討過ERP嘅可行性啦，只係最後因為被民間反對而擱置，加上新加坡已實行ERP十幾年，點解班議員遲唔去，早唔去呢？考察完對香港有咩作用呢？
委員會今次去新加坡嘅訪問，除咗會去睇當地嘅ERP及IRIS，研究當地地鐵系統同輕鐵發展，仲會了解公共交通管理措施嘅最新發展同運作情況，但呢啲考察有幾大幫助，相信大家心裏有數。
至於考察費用，除咗可用佢哋餘下個人海外職務訪問津貼外，仲有兩種選擇，如果議員選擇坐飛機經濟客位就要扣除一萬一千六百元津貼，商務客位就盛惠二萬六千八百元。香港往新加坡嘅機程只需時四小時，咁短途機程都可選擇坐商務客位，怪唔得議員咁鍾意考察喇！