政情:立會報警 維安孭飛

上周五夜晚,立法會遭遇入伙以來最大危機,財務委員會當日開會審議新界東北新發展區前期工程撥款,大約四百名新界東北村民同學生成功佔領立法會大樓地下大堂示威,搞到秘書處迫不得已要搵警方「平亂」。有行政管理委員會(行管會)委員提醒秘書處注意法律風險,聲言如果有保安因為立法會疏忽唔肯及早採取行動而引致受傷,立法會就隨時會被人入稟法院追討賠償,換句話決定報警嘅秘書長陳維安將會孭重飛、負全責。

大堂被佔 初以為足應付

據聞當立法會搬入添馬艦新大樓後,秘書處已經制訂好一套名為「4+4」嘅保安措施及風險評估,應付萬一出現的突發情況。第一個「4」係指示威嘅激烈程度,數字愈高代表情況愈混亂,而第二個「4」就指有關示威嘅具體區域,並以英文字母為代號,包括只准授權進入嘅核心地帶、大樓外圍地帶等。保安部同秘書處會按當時實際情況將大樓情況列不同級別,再按級別決定係咪尋求警方協助。

上周五傍晚,幾十位新界東北村民衝入立法會大樓示威,起初佢哋表現克制,淨係坐喺大堂嗌吓口號就算,秘書處判斷立法會保安人員可以應付,所以冇打算報警。不過,後來愈夜愈精彩,一批聲稱到場聲援嘅社運人士企圖衝破保安防線,又推撞在場嘅保安人員,搞到秘書處要將當時嘅情況升至第「2A」級別,即由保安人員應付示威活動,而警方就擔任後勤工作。

秘書處冇要求增人手

行管會前日開會後決定在明日財委會開會期間實施六項臨時措施,防止重演上周嘅混亂情況。不過,據聞秘書處唔會要求增加保安人手,只係維持上周約四十位保安員嘅做法,更加提早「打定輸數」要求警方介入。因為有行管會委員提醒,秘書處要注意法律風險,話如果有保安因為立法會疏忽唔肯及早採取行動而引致受傷,隨時會被入稟法院追討賠償,而遲遲唔肯尋求警方協助嘅秘書處幾乎係必輸無疑。

雖然秘書處大幅削減財委會公眾席座位,但唔少新界東北村民同愛字頭團體成員已經成功登記入場旁聽,而人民力量成員亦揚言到時會試圖入場「霸位」。加上財委會主席吳亮星批評唔少議員問嘅問題已經「重複又重複」,表明唔可以容許呢項議程繼續沒完沒了咁討論,相信明日財委會又會有好戲上演。

第一手消息請下載on.cc東網iPhone/iPad/Android/Windows Phone Apps