自由黨近年地區樁腳買少見少，有唔少資深黨員都走咗，不過最近終於有好消息傳出，就係成功搵到東區區議員李汝大加盟，令該黨喺港島有六名地區樁腳，其中東區更有三人坐陣，算係近年比較強嘅陣容。不過李汝大已達七十歲高齡，到底可以點幫自由黨救亡，大家可以拭目以待。
李汝大係政壇資深前輩，八十年代曾經係立法局議員，政圈一直視佢為泛民中人，然而近年同建制派中人時有互動，好似前年曾借出橫額位置畀民建聯鍾樹根，但多年來都保持無黨派身份。
消息指，李汝大雄霸北角丹拿選區多年，有人估計自由黨搵李汝大入黨，一來睇中佢喺地區實力，二來係可能係想搵人繼承佢衣缽，相信李汝大是留是退，好快就會明朗化。