中環出更：仁愛堂「膠」出綠色大計
環保講就講得多，但又有幾多人身體力行？仁愛堂尋日舉辦全年大型籌款節目巡禮，仁愛堂主席吳明珍、副主席史顏景蓮、羅台秦及鄧錦雄都有出席，大家講得最多就係環保。主力負責仁愛堂環保園塑膠資源再生中心工作嘅羅台秦話，廢棄塑膠除咗可以回收嚟製作塑膠原材料外，佢哋仲研究緊將廢膠變成柴油。鄧錦雄就話，環保係一個習慣同文化，其實市民只要行多層樓梯、搭少次車，都可以幫到地球。
羅台秦話，佢哋目前正研究緊將回收返嚟嘅塑膠重新提煉造燃油，以供工業或汽車使用。佢好有信心話，經妥善管理後，預計可以有效平衡環保業務嘅收支，甚至轉虧為盈。
倡行樓梯 健康又環保
鄧錦雄就對環保教育好上心，佢話，環保必須配合教育先可以有效推行，好似佢哋推廣減碳排放活動，就要話畀大眾知，行一層樓梯可以減少超過二百克嘅碳排放，又可以當做運動，一舉兩得。佢仲話，點解以前啲家傭可以服侍一個家族幾代人，就係因為佢哋運動量多，所以壽命分分鐘比僱主長喎！
卓妮同場仲見到好多新面孔，包括今屆新丁總理何歐陽翠華、張嘉齊及林金銓。從事海鮮生意嘅林金銓話，中國人進食海鮮嘅比率好高，喺東南亞等地區出口嘅海鮮九成係賣去中國，而佢哋留喺自己國家嘅海鮮當中，亦有一部分係被中國遊客食咗。雖然時下唔少機構提倡食環保海鮮，不過林金銓話，食牛嘅碳排放量仲高，食少一餐牛排可減少超過二公斤碳排放，大家不妨改變吓飲食習慣，支持吓環保喇！
卓妮