彈起歡呼易拉傷肌肉
【本報訊】球迷愛攤坐梳化觀看球賽，當見愛隊入球，不禁猛然躍起歡呼，這突如其來的動作，可引致背痛。物理治療師鄺凱恒指，不少球迷愛躺在梳化，「打側身」睇波，一躺可達兩小時。此舉會令脊椎得不到足夠支撐，腰椎、椎間盤、肌腱及韌帶等或會因彎曲而負荷大增，引致脊骨移位及慢性肌肉勞損，當球迷見球員入球、「嘩」一聲彈起慶祝，造成急性肌肉拉傷。她建議球迷應選擇有椅背座椅，保持正確坐姿睇波。
另外，市民於世界盃期間「腳痕」，或趁假期落場踢波，若平日少做運動，又不做熱身便急急下場，容易令肌肉拉傷。鄺凱恒呼籲球迷切勿忽略熱身，「香港人少郁動，肌肉僵硬，要做足預備動作先好落場踢波！」
落場踢最少熱身20分鐘
鄺凱恒指不少市民不了解熱身運動的重要性，或者只做拉筋等靜態熱身動作，其實球類比賽講求爆炸力，賽前應做廿分鐘動態熱身，如跑步、正身或側身撐等，可減低肌肉的僵硬程度，減少受傷風險。