中環出更：議員訪以色列 似去遊埠
立法會議會聯絡小組委員會早前先至話要去北歐三國外訪，但其實另一邊廂，工商事務委員會亦密鑼緊鼓咁籌備緊去以色列。其實議員經常都話要去外訪，仲要次次都有咁遠去咁遠。雖然話每屆議員都會有定額嘅外訪津貼，但使嘅都係納稅人嘅血汗錢，希望佢哋可以諗真啲，真係有需要先至好外訪，唔好有便宜就使到盡，嘥晒啲公帑！
工商事務委員會早前開會時都討論過話要去以色列外訪，以研究當地政府推動創新科技發展嘅經驗。委員會尋日就出咗份有關以色列外訪嘅文件，話將於今年八月三日至八日前往以色列進行職務訪問，預計每名議員嘅機票、酒店、膳食及市內交通開支為二萬九千五百元至五萬八千元不等，視乎議員選擇乘搭經濟客位或商務客位。
行程表暫得一日有職務
不過，文件就顯示只有一日行程有職務訪問，扣除搭飛機嘅時間，仲有成三日係冇行程安排，唔通班議員用公帑去自由活動？其實一場去到以色列，睇怕佢哋都不甘只屈喺首都特拉維夫，近近哋可以去埋耶路撒冷。秘書處就話，其實議員喺以色列日日都有活動安排，甚至回程當日嘅早上都有參觀活動，只係未確定行程先冇詳細列明喎。如果係咁，以後真係要寫清楚啲喇！
卓妮