呯呯呯，啟晴邨爆發驚心動魄嘅警匪槍戰，驚嚇槍聲唔止令居民提心吊膽，同時亦戳破一個假象，原來香港自稱安全城市，其實唔係咁安全嘅咋，鬧市民居竟然匿藏持槍悍匪，市民日日與殺人兇手同行，諗起都打冷震吖。
其實，香港危機四伏，得人驚嘅唔止係悍匪。嗱，冷血槍手唔係人人都遇到，不過消防隱患就遍地都係，梗有一個喺左近，唔驚就假咯。事實上，本港近年多次發生嚴重火災慘劇，消防安全問題仲不斷惡化，舊年樓宇消防設備損壞失修個案直逼三萬宗，比前年急增超過五成，而缺乏年檢個案亦堆積如山，由舊年至今年四月達四萬多宗。呢類潛藏消防隱患嘅樓宇主要集中喺旺角、深水埗及西環等舊樓區，多數係消防栓金屬配件被盜、火警鐘失靈、滅火筒過期等，一旦祝融光顧，火燒連環樓之下隨時一鑊熟。
更得人驚嘅係，當局對於呢啲消防安全隱患居然懶懶閒，你急佢唔急。消防處今年三月招聘兼職消防設備調查主管，話係負責覆檢消防裝置調查報告及分析個案喎，不過都係因人設位嘅翻閹，而且人數只得四個咁大把，相對數以萬計嘅消防設備失修個案，簡直連杯水車薪都講唔上喇。
消防設施甩漏，都市炸彈數不勝數，居民安全凍過水，當局只象徵式增加幾名調查主管，究竟何年何月至能夠拆晒所有炸彈吖？萬一火災慘劇重演，呢隻鑊邊個孭得起吖？功夫茶想問吓消防官僚，設身處地諗吓，如果你哋住緊嘅屋苑匿藏重型軍火械劫集團，而警方居然遲遲唔肯出動飛虎隊，又遲遲唔肯增派大批人手救援，只係象徵式派幾名軍裝嚟巡吓，你哋都覺得唔可以接受喇，吓話！
所以話，江山易改，本性難移，消防官僚都係冇得救嘅嘞。三年前旺角花園街排檔大火奪去九條人命，暴露舊區消防設備殘舊失修嘅問題，估唔到經歷咁沉重嘅教訓，當局依然不知反省，渾渾噩噩，視公眾安全如無物。照咁睇嚟，最缺乏消防安全意識嘅人，就係呢班失職官僚嘞！
不過話時話，消防官僚一向不務正業，佢哋對樓宇消防安全隱患懶懶閒閒唔嗲唔吊，其實一啲都唔覺得出奇。嗱，消防處正經事唔做，壞事醜事做到足，打壓傳媒、集體秘撈、知法犯法違反防火條例，甚至喺工作場所呼朋引類開派對，簡直醜聞一籮籮，鑊鑊新鮮鑊鑊甘。
計功夫茶話齋，香港危樓處處，消防處不務正業，一味熱衷偷雞享樂，實在有愧「消防處」呢個名稱，不如改名叫「消閒處」仲貼切喇！