政情：80後雙姝入新同盟
新民主同盟（新同盟）自三年前成立以來，一直都係全男班上陣，但該黨近期終於搵到兩位八十後靚女加盟，再加埋現有嘅多名男地區主任，一行十幾人將會積極考慮參加明年區議會選舉。新同盟立法會議員范國威（Gary）話，新同盟下屆目標除咗想保住喺新界東嘅勢力外，亦想以環保、規劃等議題開拓新界西版圖。
Gary話，新同盟原本形象比較剛陽，但係依家有莫明慧（Anita）同王珮芝（Vicki）兩位靚女加入，相信可以吸引男性選民眼球。Anita曾經喺加拿大讀書，因為欣賞新同盟地區工作而加入。Vicki就話，之前跟環保觸覺譚凱邦做地區工作，覺得新同盟係一個實幹型政團，所以就同譚凱邦齊齊加入喎。
據講新同盟每個月會向每名社區主任提供一千元津貼，但社區主任要定期向師傅匯報地區工作，做得唔好就會隨時被踢走。新同盟早前帶咗成班社區主任去觀摩幾場區議會補選偷師，嚟緊十一月仲會組團去台灣睇市長選舉，希望及早適應選舉氣氛。