政府每年都會就七．一舉辦連串活動，今年佢哋就將活動主題定為「活力．愛」，驟眼睇活動主題好似冇咩特別，但原來係經過政府中人精雕細琢。話說政府原本打算將今年嘅活動主題定為「愛．活力」，但因為擔心被人將個主題同本港近年冒起嘅「愛」字頭團體扯上關係及惹人聯想，最終都係決定將「愛」同「活力」嘅排序掉轉。其實咁樣調一調，仲可以同「讓愛與和平佔領中環」劃清埋界線添！
近年出現咗唔少「愛」字頭嘅親建制團體，但呢啲團體就引起唔少話題同爭議，政府對佢哋都怕怕，搞到連活動主題同宣傳標語都要避開「愛」字行頭。
另外，有消息話民政事務局局長曾德成嚟緊將會同多個本港親中社團聚會。曾德成對上一次同呢啲團體聚會已經係三年前本港申辦亞運嗰陣時，依家又再正值政改多事之秋，所以有人就質疑政府「有事鍾無艷，無事夏迎春」，搵呢啲團體幫政府造勢。不過，消息人士話政府唔係咁嘅，只係咁啱多個社團都換屆，所以都趁機會聯絡一下啫。講就咁講，但係實情有冇咁簡單呢？