政情：發展大嶼山 盡快開波！
政府話要發展大嶼山，繼早前先成立諮詢委員會後，負責計劃嘅發展局局長陳茂波近日又不停招兵，開始招聘高級經理（基建同規劃）、傳訊主任、項目統籌主任，部分月薪高達近九萬元，似乎係想高薪挖角專業人材。現時錢又有、人又夠，加上早前唔少人已建議大嶼山應該朝賭場娛樂、度假酒店、遊艇中心、會議中心「四合一」方式發展，茂波係時候手起刀落，唔好再議而不決、決而不行，否則大嶼山只會淪為下一個西九文化區。
發展局近日一口氣登廣告招聘四個新職位，講明全部主責協助大嶼山發展，最高人工分別係基建項目同規劃項目嘅高級經理，兩個職位月薪高達八萬九千元。咁高人工要求當然唔低啦，前者要至少九年土木工程經驗，後者則要十年規劃工作經驗。除咗專業人士，發展局連對內同對外嘅支援工作都開位請人，例如月薪四萬七千元嘅項目統籌主任及月薪三萬一千元嘅傳訊關係主任。
正所謂「重賞之下必有勇夫」，以現時茂波高薪招兵嘅速度推算，不足半年內發展局已擁有大批規劃發展人材，可以講係已經萬事俱備。問題係茂波點樣利用手上呢隊發展精兵，如果佢仍然對發展大嶼山議而不決、決而不行，唔敢落實發展計劃，就算擁有幾多精兵良將，都只係紙上談兵，最後只會徒勞無功。
「四合一」發展模式可取
所以茂波應該快啲以實際行動回應，唔好再浪費光陰，因為大嶼山應該點發展，坊間早已有唔少專業人士發表過意見，早前就有旅遊界人士、立法會議員、商界人士認為，大嶼山有絕佳地利，整個島嶼發展成賭場娛樂、度假酒店、遊艇中心、會議中心嘅「四合一旅遊天堂」，將吃喝玩樂全部集於一身。
其實，香港已經有賭馬、賭波，整個博彩系統運作純熟，將大嶼山發展成設有賭場嘅旅遊島，既可開創就業職位，又可增加政府稅收，唔使一味只係識得喊稅基狹窄，卻沒有擴闊稅基嘅良方。既然高人已經明燈指路，咁就要睇吓政府嘅決心有幾大喇！