中環出更：游早水上癮 陳振彬醒神
本周天氣非常酷熱，尋日端午節嘅最高氣溫高達攝氏三十三度，但仍無阻市民觀賞龍舟賽事嘅興致。卓妮尋日除咗去赤柱正灘湊熱鬧，睇吓全港最大型嘅國際龍舟錦標賽之外，仲遇到觀塘區議會主席陳振彬（Bunny）一早喺嗰度游龍舟水應節兼解暑！原來Bunny家住赤柱，咁方便，唔怪之得一大清早就起身落沙灘游水咁健康啦！
「住赤柱唔游嘥晒」
Bunny已在赤柱居住咗十五、六年咁耐，佢講起當年剛剛搬入赤柱時，覺得四周環境非常靚，如果住喺嗰度唔游水真係嘥晒喎，所以佢就的起心肝培養游早水嘅習慣。點知一游就上癮，從此風雨不改，堅持每朝八點前去游半個鐘頭早水，之後再去歎杯醒神咖啡先返工。
Bunny話，以前好少做運動，每日返工去到下午三、四點就會開始覺得好疲倦，但自從養成咗呢個做運動習慣之後，個人就精神好多，返足全日工都唔會瞌眼瞓咁話。
卓妮