中環出更：龍舟賽失獎 廠商會贏團結
去年失落端午龍舟競賽獎項嘅中華廠商聯合會（廠商會）青委，今年再接再厲，尋日一早就去到赤柱正灘，參加赤柱龍舟賽公開男女混合賽。雖然一眾青委早喺三個月前已經勤加操練，但經過三輪激烈競爭後，最後亦同獎項無緣。另一邊廂，匯賢智庫都有組隊參加沙田區龍舟賽，新民黨主席葉劉淑儀囡囡Cynthia代母出征，亦只得第五名，唔使包尾。
廠商會一眾青委去年以一秒之差，得個「梗頸四」，今年為一雪前恥苦練多時。為咗幫隊友打氣，廠商會副會長顏吳餘英及青委副主席黃浩鈞，齊齊出動私伙遊艇撐場，作為各隊員休息站。另一副會長李秀恒就帶備長鏡頭充當攝影師，拍低各成員全情投入一刻。而陳淑玲、吳永嘉等副會長期間亦落力聲援，現場氣氛熱血沸騰。
雖然青委最後喺第三輪嘅銀碟賽中輸咗，但佢哋嘅成績比去年進步咗一秒。青委主席張永鴻話，最緊要大家開心同盡興，連月來嘅鍛煉同努力，提升到大家嘅團結精神，仲令佢哋感情更加深厚。
愛女代葉劉出征拎第五
至於匯賢智庫則參加咗沙田區賽，雖然葉太、新民黨副主席田北辰及公民力量潘國山都有到場支持，但佢哋就淨係去切燒豬唔肯落水，得葉太個女Cynthia肯親自落場扒龍舟，好彩最後都叫做攞到個第五名。
賽後Cynthia透露，尋日係佢首次喺端午節扒龍舟，雖然有少少緊張，但就覺得幾好玩，希望下次可以同媽咪一齊落場。囡囡開到聲，葉太被問到明年會否披甲上陣，就即刻耍手擰頭，話要操弗啲先可以落水獻醜喎。
卓妮