俗語話，衰開有條路。高鐵延誤醜聞仲未知點樣收科，西九工程又面臨爛尾，世界級文化區變成世界級大笑話，港產官僚添煩添亂，食嘢唔做嘢，做嘢打爛嘢，問你服未！
呢，身兼西九董事局主席嘅政務司司長林鄭月娥日前承認，因為建築成本上升，加上高鐵工程延誤影響交地時間，令西九項目面對極大財政壓力，原先嘅二百幾億元撥款只夠支付首兩期工程，第三期工程無以為繼，要再檢討喎。其實，所謂嘅檢討不過講得好聽啲啫，西九淪為無底深潭，隨時爛尾至係真嘅。即係咁，家陣只有兩條路可以揀，一係放棄或縮小規模，任由西九面目全非；一係按原規劃建設，增加撥款。不過究竟要增加幾多撥款，同埋幾時至完工，港產官僚自己都矇查查。
所以話，冇咁大個頭唔好戴咁大頂帽，當初港產官僚吹到天花亂墜，一時話要令西九成為「亞洲文化樞紐」，一時又話要打造「世界級綜合文化區」，到頭來全部都係大隻講。對於西九工程爛尾，「東方報業民意調查」顯示，三成八受訪者指高鐵工程影響深遠；三成受訪者直斥文化區變得支離破碎；兩成五批評斬件式興建影響連貫性。對於西九現有資金不足應付全部項目開支，三成九直指港府當市民及立法會係提款機；三成二認為超支失控，難以接受；兩成四斥西九淪為大白象工程。
西九文化區大大話話籌備咗十幾年，依家仲係爛地一塊，而且隨時爛尾，歸根究柢都係前朝曾蔭權爵士好大喜功種下嘅禍根。大家應該仲記得，貪曾最初對巨型天幕情有獨鍾，點知爆出單一招標醜聞，被指隻手遮天，成個計劃被迫推倒重來。點知貪曾死性不改，大口氣喺文化區興建十二項豪華核心設施，仲拍晒心口保證唔會超支。結果係點，大家有眼見喇。
西九文化區唔湯唔水，林鄭仲好意思賴香港文化水平未夠班，第三期「起出嚟都係嘥咗」。其實，最冇文化水平嘅就係港產官僚，佢哋為咗附庸風雅，亂咁使錢，結果搞到笑話百出，連購買藝術品都被質疑入錯貨，物非所值。大家話嘞，林鄭身為西九董事局主席，自己有冇文化水平吖？又需唔需要負責任吖？
講到底，基建工程烏龍百出，主要原因就係港產官僚無能，佢哋冇做好把關同監管，事後仲一味卸責，簡直罪加一等。所以話啫，港府冇嘢叻，最叻就係吹水唔抹嘴，洗腳唔抹腳。咪話功夫茶唔提醒吖，基建工程樣樣延誤，樣樣超支，就算港府坐擁金山銀山，遲早都會坐食山崩嘅咋。