政務司司長林鄭月娥在上星期三出席立法會監察西九文化區的聯合小組委員會會議時，揚言要視乎本港整體文化藝術發展，先至可以決定第三批設施嘅興建時間，又話就算政府起好第三批設施，但如果成個文化發展都追唔上，都會造成浪費。藝術發展局委員黃秋生尋日接受傳媒訪問時就炮轟林鄭嘅講法係「本末倒置，信口雌黃」，反問香港足球隊都未攞過世界盃冠軍，「咁香港係咪唔起球場先？」
根據藝發局的統計，表演藝術節目嘅總觀眾人次由○七至○八年度嘅二百八十六萬，增加至本年度嘅三百三十萬人次，升幅達四成。
黃秋生話，雖然香港對表演藝術需求大增，但西九第三批文化設施同全港最大嘅音樂劇院落成無期，難免令業界擔心窒礙藝術發展，又質疑政府嘅本身策略就係當某些表演團體只是街頭表演水平。
不過，林鄭尋日就死撐日前言論並唔係想貶低文化藝術，佢咁講只係希望文化軟件可以精益求精，又話政府對西九文化藝術區有承擔，一定會落實興建第三批項目喎。兜得咁肉酸，好心就諗清楚先至講啦！