政情：鄉局皇位 千秋萬世？
今年年底又開始四年一屆嘅村代表、街坊代表及二十七個鄉事委員會（鄉委會）選舉，直到明年中嘅鄉議局換屆選舉後，才完成整個鄉事派大換班。據聞年近八十嘅鄉議局主席劉皇發都諗緊係咪競逐連任，仲有傳佢再會捲土重來奪回上屆失落咗嘅屯門鄉委會主席個位喎！發叔近呢一兩屆都話要退休，但每次到最後關頭都以鄉紳力撐為由連任，真係唔知佢想做到何年何月喇！
傳欲重奪鄉會主席
新一屆村代表選舉只剩下幾個月時間，班鄉紳都咪話唔緊張。最近新界就傳出一個消息，話發叔有意暫延佢嘅退休計劃，考慮捲土重來參加龍鼓灘村代表選舉，繼而希望重奪失落咗嘅屯門鄉委會主席，仲好有機會做多一屆鄉議局主席添。點解？據講理由係發叔未搵到接班人喎。嘩，鄉議局人才濟濟，竟然話搵唔到接班人？
有鄉紳分析話，如果發叔退休，本來順理成章應該係由副主席張學明或林偉強接棒，可惜佢哋一個冇乜鄉紳支持，一個就唔多理鄉議局嘅事，所以根本喺下屆冇人可取代發叔，所以發叔咪要「焗住」做多屆主席囉。至於副主席方面，有傳話林偉強無心於鄉事工作，所以可能搵現任荃灣鄉委會主席鍾偉平接任，唔排除發叔想栽培佢做接班人。
子料接棒立會議席
至於發叔會唔會做多一屆鄉議局立法會功能界別議員呢？據聞由於立法會近年經常「拉布」，搞到發叔怕怕，所以或會搵鄉議局入面較年輕嘅委員接棒，綜合各方面消息，最佳人選竟然係發叔兒子劉業強。其他鄉委會又點呢？據悉大部分鄉委會基本上會維持現狀，但八鄉嘅局勢就存變數，現任八鄉鄉委會主席曾憲強屆時可能會受到挑戰。
此外，大埔鄉委會亦可能有變數，主要因為下屆區議會將會取消委任制，由委任當上大埔區議會主席嘅張學明就要搵路返回區議會，所以好大機會循大埔鄉委會主席身份成為區議會當然議員，再重掌大埔區議會主席寶座。睇完上述有關鄉事派嘅部署，大家係咪覺得與近期一齣講鄉紳嘅電影同樣咁刺激呢？