中環出更：阿炳趕喺六四回港受靶
運輸及房屋局（運房局）局長張炳良尋晚啱啱離港，出發去訪問歐洲兼推廣香港嘅航運服務，但佢參加兩日活動就要急急趕住喺六四前返港，點解？原來係要趕返嚟出席立法會會議。據悉，立法會當日將進行工務小組委員會，審議港珠澳大橋香港口岸及蓮塘口岸嘅研究工程，但大橋工程屢次延期，蓮塘口岸又多番超支，加上一筆高鐵延誤嘅混帳，張炳良今次特意飛回港出席立法會會議，睇嚟都係受靶居多！
訪歐兩日 推動航運服務
首先講吓珠港澳大橋香港口岸嘅工程，由於多次出現截標延期嘅情況，工程完工日期亦要延長，超支達八十九億元。至於蓮塘口岸，就因為造價不斷上升，結果令項目超支八十五億元。其實同運房局有關嘅工程超支、延期都唔係第一次發生，好似廣深港高鐵香港段工程就係最佳例子。運房局啲工程咁多問題，又做得咁慢，如果張炳良唔親自坐鎮，點應付立法會議員嘅質詢呢？
張炳良周二返港後，會改由副手、運房局副局長邱誠武接力，去倫敦同當地官員會面及拜訪航運組織，以及出席研討會。要邱誠武接力，好可能信唔過佢留守香港，寧願益佢出去交際吓好過。
卓妮