怪事年年有，今年特別多，香港劏房遍地開花，大家早就見怪不怪咯，家陣搞到連居屋都有劏房，你又見過未吖？
唔係講笑，將軍澳浩明苑就有辦你睇嘞。有位居於上述居屋屋苑嘅楊小姐投訴，四年前開始發現客廳多個位置及廁所滲水，多次向管理處反映，後來至知道上層單位被劏成四間套房，而套房廁所懷疑就係滲水源頭。唔怪得投訴人質疑，原來居屋都可以做劏房咩？就算要改劏房收租搵錢，都唔可以影響到人哋！
其實，私人單位原則上係可以改建成劏房嘅，前提係必須符合法例規定，例如通風、消防等設備要符合標準，可惜現有劏房之中大部分皆屬違規，好似呢個被指滲水嘅居屋劏房明顯有問題喇。最離譜嘅係，楊小姐四年前已向多個部門投訴，問題一直未獲解決，直至舊年十二月房屋署至表示已發出勸喻信及命令，要求業主還原單位，點知到依家仲係紋風不動。
房屋署發言人係咁講嘅，該署○一年一月接獲有關投訴，派獨立審查組視察後發現單位有疑似劏房間隔，工程違反《建築物條例》，但因業主多次上訴而須暫停執法，最近至將個案轉介予屋宇署，考慮提出檢控，一經定罪最高可判處罰款二十萬元及監禁一年，每日仲可能另加罰款二萬元喎。
嗱，呢啲咪就係官僚作風囉，處理一個又違規又滲水嘅居屋劏房單位，拖咗四年幾仲未搞掂，問你服未。好話唔好聽，劏房危機處處，萬一發生火警等意外，隨時搞出人命，呢隻鑊房屋署孭唔孭得起吖？正如有立法會議員話齋，居屋嘅定位係私人樓宇，但監管及執法就分別由房屋署及屋宇署負責，根本唔合理，只有整合權力，簡化程序，至可以有效打擊違規劏房。講就係咁講喇，當局聽唔聽又係另一回事。
提到劏房問題，真係一匹布咁長。當局年前委託獨立機構調查，聲稱全港有六萬六千幾間劏房，其中三萬幾間缺乏廚房、獨立廁所及食水供應等設施，合共有十七萬人居住喎。而民間組織調查就指全港最少有二十八萬劏房戶，仲未計工廈劏房添。其實，無論相信邊個數字都好，劏房問題愈來愈嚴重，連居屋都淪陷埋，已經係鐵一般嘅事實，唔到當局繼續迴避。
講到底，劏房之所以氾濫成災，皆因房屋問題積重難返。樓價高企，租金昂貴，好多基層市民負擔唔起，如果唔想露宿街頭，除咗蝸居於劏房之外，仲有乜嘢選擇吖。所以話，要解決劏房問題，首先就要解決房屋問題，亦即係所謂嘅施政重中之重，唔知究竟仲要等幾耐呢？