早前我哋提到有傳聞指上水鄉事委員會主席侯志強有意加入北區撲滅罪行委員會，周圍搵人幫佢搭路，雖然侯志強話冇諗過加入，因為曾有人叫佢做主席佢都唔做，又點會主動想申請咁話。無論真相如何，侯志強確係好有心撲滅罪行，前日下午佢就接到一位女村民恐嚇，侯志強話考慮係咪要報警備案喎！
話說上水某鄉村最近有些少紛爭，一名女村民喺屋企門外擺放咗個神位，遭到住喺附近嘅村民齊齊反對，結果雙方互相指罵，仲搞到報警求助添！侯志強得知事件後，前日特登去到現場了解情況，試圖排解糾紛。點知涉嫌喺屋外放置神位嘅女村民事後知道後，就氣沖沖咁去鄉委會辦事處，同職員口出惡言話，侯志強阻住佢拜神，所以要受斬。幸好侯志強當時唔喺辦事處，否則就唔知情況會唔會失控喇！
事後侯志強同我哋講番件事，佢話由於事件涉及個人安全問題，所以話考慮係咪要報警備案喎。侯志強咁熱心滅罪，唔知北區撲滅罪行委員會會唔會考慮搵佢入會呢？