政情：老美抬阿婆上轎 焗北京硬啃？

始終係西餐 唔係中菜

但其實公提方案與陳太方案嘅分別，純粹係「一碟辣，一碟冇咁辣」，總之都係「西餐」而唔係「中菜」，美國佬唔知係咪喺度「玩兩手」、「扮黑白臉」，想逼北大人硬啃？

民主阿婆喺兩個幾月前，以佢一手創立嘅「香港2020」名義發表咗個頗為複雜兼騎呢嘅普選特首方案。該方案建議將來負責提名普選特首候選人嘅提名委員會，一共由一千四百人組成，其中首三個界別與現有選舉委員會一樣，各維持有三百人，但要將所有公司票或團體票變為個人票；至於第四界別政界，就建議增至五百人，當中包括三百一十七名由全港合資格選民一人一票直選產生嘅委員，希望變相做到「間接公民提名」嘅效果，但又冇激進泛民提出嘅直接公民提名咁辣喎。

之不過，睇真啲呢個所謂「少辣」嘅陳太方案，訂明普選特首參選人只須得到十分一提委、即一百四十個提名，就可以「出閘」成為正式候選人，門檻仲低過現行特首選舉嘅八分一選委提名，變相令北京喪失晒對整個特首選舉嘅控制權，仍然非常惡啃。

與李漢奸孖必唱衰港

一直妄想擔任「泛民共主」嘅陳太，自以為呢個中間落墨方案可得到溫和泛民以至北京接納，但其後佢好衰唔衰，聯同外號「李漢奸」嘅民主黨創黨主席李柱銘「行孖必」出訪美加，一邊「唱衰香港」，一邊向山姆大叔推銷佢嘅政改方案，並獲美國副總統拜登「路過」接見，最終換來北京狠批兩人「挾洋自重」、「尿錯壺」同「行臭棋」等，大大降低北京接納陳太方案機會。

不過近日又有消息指，山姆大叔決定「人棄我取」力撐陳太方案，仲講到好似想幫北京解困。消息又指，佔中提出嘅公提方案係「激辣」，疑似係幫陳太嘅「少辣」方案做掩護，「扮黑白臉」逼北京揀個冇咁辣嘅。而據聞早前有泛民議員與中聯辦高層會面時，雙方亦討論過陳太方案，唔知係咪同美國佬嘅最新決定有關。面對山姆大叔「玩兩手」，唔知北大人今次會如何應對呢？