中環出更：克勤講舊史 踢波常見「紅」
世界盃足球賽就嚟開波，全城熱切期待，尋日立法會議員梁國雄（長毛）、陳克勤同埋莫乃光（Charles）就出席一個推廣世界盃節目，長毛同Charles仲落場踢埋一份。身為立法會足球隊隊長嘅克勤只係喺場邊督師咗一陣，就因事早走，佢同卓妮講起細個踢波嘅故事都幾搞笑。
克勤話，當年屋企無錢買正規足球，唯有買五蚊一個嘅西瓜波喺屋邨踢。大家都知西瓜波充氣位有粒錠，克勤又成日練頂頭槌，結果搞到額頭經常有紅印。加上成日有人投訴佢哋踢波太嘈，所以保安員就時不時沒收佢哋嘅波，後來佢哋就用報紙自製，不過額頭就變成黑色喇！於是佢哋就將啲報紙塞入隻襪度，克勤聲稱係偷師自球王比利喎！
長毛瞓身守龍門
講返尋日場比賽，長毛冇好似喺立法會拉布咁hea，表現都幾落力，不過因為左腳舊患未好番晒，射波仲係腳仔軟，唯有瞓身守龍門，仲成功擋出一記必入球，幫手贏咗場波。講起立法會即將審議成立創新及科技局，長毛已揚言拉布，支持開局嘅Charles笑言，考慮搵長毛一邊睇世界盃，一邊灌佢飲酒，不過長毛咁飲得，到時可能自己醉咗先喎！
卓妮