中環出更：青聯創意糉 長者未食都開心
端午節年年有，糉亦經常有得食，但係年輕一代多數唔知點炮製。香港青年聯會副主席黃夢瑩（Monin）為咗推廣呢個傳統文化，尋日特登搵班青聯手足向酒家資深廚師學整鹹肉糉，然後分贈畀長者及露宿者。青聯主席霍啟剛、副主席林玉茵（Maya）等人都去趁熱鬧，眾人雞手鴨腳不在話下。Maya就發揮創意喺糉葉添上蝴蝶結，相信長者未食就先開心笑喇！
多番請教 唔願求其
尋日到場嘅除咗啟剛、Monin及Maya之外，仲有青聯常董蔡敏思（Mence）、會董邱詠麒等靚女，大家跟足謝師傅教落嘅程序依樣畫葫蘆，重複鋪排糉葉、放餡料、紮糉等步驟，睇落好似好簡單，但就考起一眾叻仔叻女。Monin初初未能掌握糉葉嘅鋪排，啟剛就學足謝師傅咁用牙咬住鹹水草紮糉，但不得要領。佢哋兩人都唔願馬虎了事，多次向師傅請教，反覆嘗試，終於都有外表似模似樣嘅鹹肉糉面世。
霍啟剛：老婆愛吃
講起食糉，啟剛話佢同太太郭晶晶都鍾意食，不過口味各有不同。事關太太係北方人，鍾意食甜糉。鹹肉糉材料少不了豬肉，卓妮見Mence包糉時就冇落豬肉，因為佢怕接觸生豬肉，所以就用三隻鹹蛋黃取代。
Mence笑笑口話，食月餅時見到愈多蛋黃就愈開心，所以咪加料放多啲囉！
負責幫呢班靚仔靚女執靚啲糉嘅謝師傅話，呢班初哥包糉手法生硬在所難免，不過外形係其次，最緊要食材安全、衞生，咁長者及露宿者就食得開心喇！
卓妮