港鐵路路不通，工程延誤已經唔係新聞，工程冇延誤先至係大新聞。嗱，大家不如估吓今次又輪到邊條支線出事？其實都唔使估喇，港鐵興建中嘅五條支線，高鐵、沙中線、西港島線、南港島線、觀塘延線，全部延誤，問你服未！
港鐵尋日承認，連接上環至堅尼地城嘅西港島線工程出現滯後，可能無法如期喺今年十二月通車，需要延至明年第一季至可投入服務。究竟點解會延誤呢？港鐵話喎，由於西營盤站土質鬆軟，要採用凍土技術，導致挖掘緩慢，就算西港島線勉強喺年底通車，西營盤站亦無法啟用。
真係唔到你唔服，港鐵管理混亂，烏煙瘴氣，仲要同時拓展五條新支線，結果五線齊齊延誤，出事率係百分之一百。更好笑嘅係，鐵路工程延誤，港鐵次次都有藉口，之前高鐵同南港島線延緩，就賴地質太硬，家陣輪到西港島線滯後，就賴地質太軟，講出嚟都笑死人喇。不如咁吖，港鐵以後承接鐵路工程時，指明地質要軟硬適中，唔能夠太硬，亦唔能夠太軟，好唔好？
正所謂，江山易改，本性難移。工程延誤能瞞則瞞，能騙則騙，無法瞞騙就搵藉口搪塞，呢種手法已經成為港鐵推卸責任嘅方程式。老實講吖，西港島線工程延誤，你估港鐵今日至知道咩，佢哋拖至尋日至公布真相，皆因知道問題拖無可拖，瞞無可瞞，所以咪打定預防針，為日後卸責鋪路囉。難怪有立法會議員批評港鐵遮遮掩掩，不盡不實，根本就係蓄意隱瞞！
講到底，港鐵工程延誤，最無奈嘅始終都係市民。嗱，鐵路工程好事多磨，港鐵仲可以諸多藉口，賴三賴四，但係鐵路延緩搞到造價飆升，白白浪費巨額公帑，呢筆帳納稅人可以向邊個追究呢？就講高鐵吖，因為工程延誤而遭承建商索償嘅個案就多達六百幾宗，涉及逾百億元，咁搞法，港府就算有金山銀山，都唔夠畀港鐵填氹喇，吓話？
俗語話，一節見則百節知。單係一個港鐵已經搞到滿城風雨，民怨載道，港府管治究竟幾無能，唔使問阿貴喇。歸根究柢，港鐵工程問題百出，癥結就係港府監管不力，正如有人話齋，港府監督港鐵工程一味文件往來，雙方淪為筆友關係，唔出事至奇喇。難為當局仲若無其事咁，話「會繼續緊密監察西港島線工程進度」喎，簡直不知羞恥！
既然港鐵工程延誤已經唔係新聞，大家不如估吓港鐵同港府邊個要問責呢？其實，港府同港鐵互扯貓尾，互相包庇，根本冇人會被問責！