政情：李家傑訪董建華傾中美問題
尋日大約下午三點五十分，恒基地產主席李兆基大仔李家傑（Peter）喺保鑣護送下，現身中環前特首辦公室，逗留至五點十五分才離開。唔通佢嚟見「貪曾」前特首曾蔭權爵士？Peter話唔係，佢係同前特首董建華會面，兩人傾咗中國與美國嘅問題，至於具體內容係乜嘢，佢就不願多講喇。
行色匆匆 離開輕鬆
Peter到訪時行色匆匆，離開時神情就輕鬆好多。原本佢已登上座駕，但係見有記者訪問，就好有禮貌咁出返嚟。今年三月Peter喺北京突然發炮批評港大民意研究計劃為反對派提供民意基礎，引起一陣嘩然，依家又咁關注中美問題，唔知Peter有咩大計呢？
咁啱尋日Peter前腳入門，行政會議成員張志剛後腳就到，佢同Peter一樣逗留接近一個半小時，仲等Peter離開後先至行返出嚟。張志剛都話唔係見貪曾，至於係咪見董建華，佢就唔肯回答，只係話耐唔耐都會嚟喎！