佔領中環行動（佔中）三子之一嘅陳健民話過，如果六二二全民投票日冇十萬人投票，佢哋係時候引退。到尋日佔中三子再次現身開記招，講解「六二二全民投票」詳情時，佢哋又話冇十萬人投票唔代表佔中「玩完」，仲要為投票作出新定義，聲言投棄權票同白票都計數，總之夾埋有十萬人投票就得。咁樣佢哋玩晒啦，呢啲唔單止係「搬龍門」，簡直係胡亂「釋法」。
六二二當日會有兩條問題，第一條有四個選擇，包括真普聯方案、人民力量方案、學界方案及棄權。佔中三子認為，如果有十萬人投票就算合格，但就算有十萬人投票，當中五萬人係投棄權，都當自己合格。
問題就喺呢度，民主精神唔係少數服從多數咩，如果棄權票係最多，佔中三子點解唔反省吓呢？而且，佔中三子仲話，得票最高嘅方案先等同獲市民授權，無論棄權票幾多都係無用喎。
提提大家，佢哋揀方案時都冇計算棄權票，但總投票人數又計埋棄權票，佔中三子完全演繹出咩叫「輸打贏要」囉！