政情：泛民獨裁源來要解畫
中聯辦官員近兩個月四出邀請泛民主派立法會議員見面，但除咗衞生服務界李國麟之外，其他泛民黨派依然扭扭擰擰，諸多要求，包括要集體會面、唔入中聯辦大樓等，否則會杯葛會面。點知教育界議員兼教協總幹事葉建源前日就喺銅鑼灣一間酒店同中聯辦官員會面，但就隨即被人質疑事先冇知會泛民，又鬧佢政治敏感度不足，嚇到佢話下次一定會同泛民「單聲先」，真係慘過做賊，反映泛民認真獨裁。
備受各方指責下，葉建源尋日聯同教協會長馮偉華開記招詳述與中聯辦官員會面嘅始末。佢話喺四月底收到中聯辦官員電話，話中聯辦官員有意約佢見面，佢隨即喺教協常務會報告情況，訂下唔喺中聯辦見面等三大原則。直到今個月中回覆中聯辦話同意會見，之後發電郵畀教協七萬位會員，話知有關會面安排，但就無提及會面嘅時間同地點。
酒店商政改兩粒鐘
直至前日下午三點鐘，葉建源在銅鑼灣維景酒店一間會議室同中聯辦官員會面接近兩個鐘。佢向中聯辦官員送上教協嘅政改立場書及前總理趙紫陽在八四年回覆港大學生會嘅信件，話香港人唔要一個有篩選嘅假普選，而中聯辦官員就重申，將來嘅普選方案應該得到中央政府及香港市民嘅「雙認許」，又呼籲社會各界把握機遇通過政改方案。
葉建源形容，會面氣氛尚算互動，但仍然流於各自表述，雙方立場亦未見有改變迹象。雖然有泛民批評佢「好可疑」，但佢解釋事先無通知傳媒只係技術上嘅考慮，唔想喺一個混亂嘅情況下開記招，強調今次並唔係密室談判，亦唔係想隱瞞公眾，相信事件唔會影響泛民之間嘅團體關係。
搞事四人組卻無視
雖則葉建源今次被人質疑佢偷偷摸摸，但「民主阿婆」前政務司司長陳方安生經常聯同「李漢奸」民主黨創黨主席李柱銘勾結外國勢力，之前仲去美國國會見副總統拜登，之後李漢奸又被本報影到佢同壹傳媒老闆肥佬黎、何俊仁及李永達等人密會兩個鐘，都唔知係咪暗中策劃驚天大陰謀。如今泛民嚴詞批評葉建源唔老實，但又對「搞事四人組」嘅所作所為視而不見，唔知咁係咪叫做雙重標準呢？