中環出更：郭偉強來年做老襯 話買唔起樓
今屆立法會多咗唔少後生嘅男議員，但當中未結婚嘅唔係好多，而過埋今年又會少咁個鑽石黃老五。勞工界議員郭偉強尋日宣布，明年二月初將會同拍拖兩年嘅女朋友Myolie拉埋天窗，喺尖沙咀一間酒店筵開四十圍，邀請勞工界圍內好友出席。佢話自己一早有結婚計劃，但就唔識花心意設計求婚情節，最後決定喺情人節買花求婚，估唔到女友都係咁驚喜。
澳門之旅開始拍拖
據講Myolie喺元朗區議員姚國威個妹妹，細郭偉強六年，從事會計行業。至於相識經過，郭偉強透露，佢哋兩年前喺澳門之旅開始拍拖，當時佢好似怕醜仔咁唔敢向Myolie表白，驚足成個鐘頭船程之後，終於喺落船後鼓起勇氣拖住Myolie隻手，咁就得咗喇。正因為兩人相識在澳門，所以佢哋影婚紗相都特別揀番喺澳門，希望留下美好回憶。
雖然郭偉強依家已經抱得美人歸，但依然未能成功置業，佢話希望搵個港島南區附近嘅物業，但睇勻嘅樓盤閒閒哋都要幾百萬入場費，所以暫時都要做住無殼一族喎。其實佢貴為立法會議員及東區區議員，每月人工近十萬元，咁都話買唔到樓？
卓妮